BIASHARA YA BINADAMU MBEYA; WATOTO WANUNULIWA NA KUSAFIRISHWA KINYEMELA

Na Gordon Kalulunga, Mbeya

BIASHARA ya binadamu imeshika kasi mkoani Mbeya ambapo kundi la mawakala wa biashara hiyo limejikita mkoani Mbeya, kalulunga blog imebaini.

Binadamu wanaonunuliwa na kusafirishwa kwa kurubuniwa kupewa fedha nyingi ni vijana wa kiume wenye umri kati ya miaka 12-25.

Mtandao huu kwa kushirikiana na jeshi la Polisi mkoani Mbeya hasa Kamanda wa polisi Diwani Athumani, limefanikiwa juzi kupatikana kwa watoto 13 waliokuwa wakisfirishwa.

Vijana hao walitoroshwa eneo la Mtakuja kijiji cha Mbalizi wiaya ya Mbeya vijijini Desemba 3, mwaka huu na kulazwa stendi kuu ya mabasi Jijini Mbeya.

Desemba 4, mwaka huu, walipakiwa kwenye basi la kampuni ya Super service lililokuwa likielekea mkoani Tabora.

Kikosi kazi cha kalulunga blog, kilifuatilia tukio hilo kwa karibu na kufanikiwa majira ya saa kumi na mbili kasorobo Alfajiri ya desemba 4, mwaka huu, kumwokoa kijana mmjoa aliyejulikana kwa jina la Casto.

Baada ya zoezi la kumchukua ndani ya gari hilo eneo la Isanga kilomita tatu kutoka katikati ya Jiji la Mbeya, ndipo ikatolewa taarifa kwa kamanda wa polisi mkoa wa Mbeya na idara zingine za serikali.

Majira ya saa saba mchana, taarifa za kukamatwa mmoja wa wanamtandao hao ziliufikia mtandao huu na kwamba jeshi la polisi wilayani Chunya lilifanikiwa kuwaokoa vijana 12 waliokuwa wakisafirishwa kupelekwa kutumikishwa kwenye mashamba ya Tumbaku mkoani Tabora.

Kamanda wa polisi wa wilaya ya Chunya, aliwasiliana na Mwandishi wa habari hii na kuthibitisha kukamatwa kwa mtu mmoja aliyekuwa akiwasafirisha vijana hao wakiwemo watoto na kwamba yeye hakuwa msemaji.

Awali, kijana Casto(16), alisema alikuwa na wenzake ambapo wanunuzi wa binadamu hao waliwapatia kila mmoja Shilingi 15,000/= na kuwaahidi wakifika Tabora watawalipa Tsh. 500,000/= kwa kila mmoja.

Aliwataja baadhi ya wenzake ambao walikuwa nae kuwa ni Gidion, Zawadi, Meshack, Bahati, Izack na mtoto mmoja ambaye alisema kuwa hamkumbuki jina na kwamba mtu aliyewarubuni naitwa Given ambaye alielekea wilayani Mbozi kununua vijana wengine.

Baadhi ya wazazi waliozungumza na kalulunga blog, walimshukuru kamanda Diwani Athumani kwa kuwezesha watoto wao kupatikana wakiwa salama maana awali walikata tamaa kutokana na majibu waliyopewa na baadhi ya askari katika kituo cha polisi Mbalizi walipokwenda kutoa taarifa ya upotevu wa watoto wao.

Naye Mkurugenzi wa asasi ya mazingira mkoa wa Mbeya(MRECA) inayojihusisha pia na upigaji vita biashara ya binadamu, Mchungaji William Mwamalanga, alimpongeza kamanda wa polisi mkoa wa Mbeya kwa kufanikisha kuokoa watoto hao na kulaani vitendo hivyo vinavyoendelea katika baadhi ya mikoa hapa nchini.

CHANZO: http://kalulunga.blogspot.com/2013/12/biashara-ya-binadamu-mbeya-watoto_8384.html